Um listamanninn
Guðmundur Thorsteinsson - Muggur var fæddur á Bíldudal, sonur hjónanna Ásthildar Guðmundsdóttur og Péturs J. Thorsteinssonar útgerðarmanns.
Hann fluttist árið 1903 þá 12 ára gamall með fjölskyldu sinni til Kaupmannahafnar. Fjölskyldan flutti svo aftur til Íslands árið 1910 en varð þá Guðmundur eftir. Hann bjó ýmist á Íslandi eða Danmörku og ferðaðist mikið.
Dvaldi hann m.a. um lengri eða skemmri tíma í Þýskalandi, Noregi, Svíþjóð, Ítalíu, Spáni, Frakklandi og Bandaríkjunum.
Guðmundur lést 27. júlí í Sölleröd á Sjálandi, Danmörku og var jarðsettur í kirkjugarðinum við Suðurgötu í Reykjavík.
Á legsteini hans er mósaíkmynd eftir Elof Risebye.
Árið 1958 gaf Elof Riseby prófessor í Kaupmannahöfn Listasafni Íslands 46 verk eftir Guðmund, en Riseby hafði safnað skipulega verkum eftir hann frá árinu 1927.
Árið 1981 var reistur á Bíldudal minnisvarði um Guðmund Thorsteinsson - Mugg og er hann eftir Guðmund Elíasson myndhöggvara.
